• August 15, 2020

Alarmante: 444 raste aktive me koronavirus në Prishtinë, prej tyre dhjetëra fëmijë të infektuar

Jun 29, 2020

Nga 1 mijë e 203 raste aktive me koronavirus në Kosovë, 444 prej tyre janë të regjistruara në komunën e Prishtinës


Kështu ka bërë të ditur Drejtori i Shëndetësisë i kësaj komune, Bujar Gashi, me anë të publikimit të statistikave të fundit me Covid-19 në kryeqytet.

Madje, prej tyre 41 raste janë fëmijë të moshës 0-14 vjeç, e që prej tyre 15 janë fëmijë deri në katër vjeç.

Brenda 24 orëve të fundit, edhe 8 raste të reja pozitive iu shtuan listës së të infektuarve me virusin korona, ndërsa numri më i madh i tyre u shënua në Prishtinë, me gjithsej 33.

Që nga data 20 mars kur edhe u shënua rasti i parë pozitiv me koronavirus në Prishtinë, deri më sot janë regjistruar në total 588 persona të infektuar, prej të cilëve 141 kanë arritur të shërohen plotësisht, kurse tre raste kanë përfunduar me fatalitet.

Statistikat tregojnë se nga totali prej 588 rasteve janë 293 femra dhe 295 meshkuj.

Prandaj nga vatra e re e pandemisë, është bërë thirrje që të zbatohen të gjitha udhëzimet për masat mbrojtëse kundër përhapjes së mëtutjeshme të kësaj sëmundje.

Nga ana tjetër, për shkak të rritjes së numrit të infektuarve me koronavirus, Qeveria e Kosovës sot ka filluar kthimin e disa prej masave, ndër to janë edhe puna vetëm me staf esencial e institucioneve të Kosovës. Do të mbyllen sektorët në të cilët ka raste të paraqitura me infeksion, duhet të ketë kontrolle rigoroze për të infektuarit, që të mbahen në izolim 2-javor, inspektorati sanitar duhet të marrë masa në përputhje me ligjin. /gazetametro.net